OP娛樂 【幸福準媽媽胡杏兒】 想三...

【幸福準媽媽胡杏兒】 想三年抱兩:老公鍾意女,我就…

5928
0
分享

啱啱成為準媽媽嘅幸福人妻胡杏兒今日去葵涌出席活動,同場仲有宅男女神陳瀅及台灣男星王陽明。現場目測杏兒上圍豐滿咗,肚有少少微凸,不過佢都照着兩吋高粗踭高踭鞋現身。大會亦好貼心咁送贈嬰兒用品禮盒俾胡杏兒。

喺側面睇,杏兒腹部明顯隆起,大會影相時杏兒雙手放喺肚上面,幸福笑容自然流露。接受訪問時,記者問杏兒係咪懷胎4個多月?預產期係咪聖誕節,佢一概以「都係差唔多」回應,記者問杏兒唔清楚預產期咩?佢就話:「知,不過想保持神秘感。」問到杏兒知道BB係仔定女未?佢就話:「o依家諗緊去照超聲波時睇,定係生嗰時留番驚喜俾自己,暫時都未知。」咁杏兒想順產定開刀?佢話:「順產,因為復原得快啲,(係咪想快啲可以再生多個?)都係㗎,爭取時間啦。」係咪想三年抱兩?杏兒話:「都想,不過唔知自己搞唔搞得掂,handle到就生多個。」又問到老爺、奶奶同埋老公係咪想生仔多啲?杏兒話:「老公鍾意女,我就冇咩所謂,終於感受到人哋話BB健康最緊要。」咁老爺奶奶呢?杏兒話:「佢哋都冇所謂呀,BB健康就好開心喇,冇話催要知仔定女。」杏兒身形明顯有改變,問到佢係咪放縱食嘢?佢就話:「唔係呀,不過放假時感受到肚真係大咗、漲咗好多,個人又腫咗,個肚都實咗好多,係越嚟越硬;加上休息夠,朋友話都會長胎。」杏兒又講自己都係肥咗5磅啫,但係胃口就唔太好,會三更半夜叫老公買魚蛋粉俾佢食。另外,醫生話杏兒BB Size比正常BB大咗少少,佢話:「我自己都驚佢大得滯好難生。」至於有冇谷奶,杏兒笑言:「未度過,但係個人係有腫咗,不過內衣就唔使換住。」

(蘋果日報)

留下一個答复

請輸入留這
請輸入名字