OP娛樂 【身型脹咗好多】疑內分泌失...

【身型脹咗好多】疑內分泌失調、荷爾蒙影響

42
0
分享

RubberBand(RB)、Kellyjackie、張子丰、陳思欣、鄧小巧、AGA及陳柏宇噚日喺屯門出席活動,RB上年有參加呢個活動,佢哋話喺海灘睇住日落唱歌,好有夏日feel,而下月9號,RB會同Yellow喺九展開騷:「企位仲有嘢飲,18歲以下都可以入場,不過唔俾飲酒。」

 

RB最近同唔同嘅單位合作,下年成軍10周年,將舉行演唱會慶祝呢個重要嘅日子,RB話:「場地仲未搵,邊度開冇所謂,就算紅館開但觀眾坐喺度冇氣氛都冇用,上年喺旺角麥花臣開幾場,觀眾距離近氣氛好好,好開心。」

 

至於,同場嘅Kellyjackie身型脹咗唔少,佢話最近身體唔多好,早排因為個胃有事,入咗醫院:「醫生check完拎走啲唔好嘅嘢,胃有息肉,第一次body check,一照就話有異常,好彩醫生話係良性息肉,切咗就冇事。」另外體重上升原因,佢話同病有關:「屋企人都話腫咗好多,唔知咩原因,報告未出,醫生話可能同內分泌失調、甲狀腺,或者受荷爾蒙影響,下個禮拜去睇報告先知乜事。」

 

講到老友吳若希近況,Kellyjackie笑言對方有女萬事足,好enjoy同個女相處嘅時間:「我同佢facetime,每次都見到佢個女喺身邊,兩母女都脹卜卜,Jinny話除咗塊面之外,全身都脹卜卜,佢個女嘅手指腳趾都好長,第時一定係靚女,遲啲有時間會去探班,呢個時候佢嘅家人成日圍住個小朋友,Jinny話唯一係餵奶嘅時候先有機會抱番個女。」

(蘋果日報)

留下一個答复

請輸入留這
請輸入名字